搞o左一大排, 幾經驚風散, 終於都做得成按揭, 搞掂dbs同hkmc, 完成交易喇.
原本真係打算搬入去住, 但懷孕之後嘅太太實在變化多端, 咩都估佢唔到! 而家就話覺得太遠, 唔搬喇.
本來狗狗同人都可以有較大嘅空間, 有兩層高, 又有仲有閣仔俾工人瞓, 仲有個大花園添, 除o左遠d之外, 真係fit到脾o架...
不過唔緊要啦, 希望而家可以賺少少, 得過全身而退就好了...
回想起由去年10月,11月開始睇錦繡以來, 波折重重, 有交o左票, 但第2朝臨時彈弓手唔租嘅駭突單位, 有差少少成功, 後尾俾美聯tiffany截o左糊嘅豪裝泰式單位, 之後仲有搞到一鑊粥, 差d要打官司先攞得番十萬銀嘅g2,21鬼屋, 到終於買到心頭好, 不過而家又嫌遠嘅l4,49....簡直可以用驚濤駭浪來形容.\
家陣總算各一段落了, 真的要感謝天父, 一切大步檻過, 執番身彩....
真係好好味嘅漢堡包...
CWB 新寧道附近嘅SHAKE'EM' BUN. 扒厚, 料足, 汁多, 包脆, Hawaiian Surfer Girl 仲有香脆煙肉, 新鮮蕃茄同波蘿添...食落好FRESH,而且冇咁肥膩. 十個正!!
距離bb出世尚有一段時間, 但就已經開始密鑼緊鼓咁張羅所需了...
當中當然少不免老婆嘅強項-----買買買!!!
呢個星期永安大減價, 老婆話格過晒全城至抵, 於是, 連續掃貨兩天...
當中留連嬰兒部嘅時間最多...
搖搖椅,
推車仔, 床仔, 圍欄, 衫仔等等...
之後再去孕婦部, 仲掃埋廚房用品, 飲品同食品...抽獎都抽到手軟; 不過埋單就...
...原來洗錢真係可以快過搵錢咁多!!!
bb用品都已經買得7788了, 不過咁早預備晒, 到時d用品唔知會唔會過時或者發霉呢?
舊年十一月,見到架X5幾靚, 價錢又ok, 一心以為係upgrade啦; 點知揸落去先知底蘊...
論外型, 內襱, 真係唔錯, 鋼水手感亦一流, 不過唔夠好嘅地方真係仲多...
首先3000cc原來對呢部2000kg嘅大牛龜o黎講真係唔夠用...起步真係有抖唔切氣嘅感覺. 空間方面, 更加冇諗過原來外型大d嘅X5, 入面竟然冇HARRIER咁見使, 車尾箱尤甚....
至於設計上, 就肯定輸幾條街添...車身腳踏冇用之餘仲阻住落車添...而車箱可以儲存物件嘅地方真係少到難以置信...有Ｄ BUTTON位亦好唔細心, 唔係咁得心應手...
最後一個致命傷, 就係大食到唔恨...$2.2, $2.3一公里真係走唔甩...
如果唔係個brand夠響同2手價夠硬, 我一早就唔要佢喇...
真係估佢唔到, 9萬幾嘅99年RX300, 竟然好過27萬幾, 02年嘅X5...
揸o左架318年幾,兩年, 由單身變o左人o地老公,而且仲多o左coco呢隻拉布拉多犬...部車似乎開始唔係好夠用...又要換喇...
未夠錢買新車, 又唔憤氣俾咁多錢政府, 左揀右揀, 最後就俾老婆搵到呢部HARRIER RX300.
呢架車, 係我揸咁耐車以來表現最全面, 最滿意嘅一部!!
3000cc,馬力足, 空間夠, 車尾箱放晒兩隻狗都夠有突; 而且冷氣勁, 音響好, 車箱隔音一流....雖則係舊車, 但車款依然ok!! 9 個正!!
4年後, 架車開始老化, 而且, 眼前有件更加重要嘅人生大事. 趁架車仍然有d resale value, 率之忍痛割愛, 賣o左我第一架車...
多謝你呀, 好兄弟...再見喇!!
賣車嘅錢, 有好多其他用途, 只可以平平o地買o架2 手車, 揀o左一輪, 終於選擇o左....
冇錯, 就係呢架bmw 318ia喇!!
雖然有成十年車齡, 係舊o左d, 不過handling仍然有水準, bending一流, 仲試過掟彎勁得滯, 磨穿o左條車軚添...
2000年, 係值得記念嘅一年; 除o左係千禧年之外, 仲係我第一次擁有自己心愛嘅車...
呢架就係我當時最鍾意, 死慳死抵o左幾個, 之後仲要月月供嘅 三菱pajero io喇...
紅色幾sharp!!
我就係鍾意佢嘅內襱夠cyber!!!
雖然空間細d, 不過已經好夠用...
至於力量就真係爭d喇...唔緊要啦, 我又唔係飛車一族...型就得啦!!
男仔關係, 由細到都鍾意車.
細細個一落街就要老豆o係樓下買火柴盒車仔, 番屋企就用雪櫃入面嘅冰格o黎當停車位咁放晒d車入去...
4, 5歲d就有架3輪車, 後尾仲多一架紅色嘅腳踏私家車添...日日就o係出面條走廊風馳電際...好不興奮.
大個o左, 反而要到廿幾歲先儲夠錢學車, 好彩一take就pass, 而當時份工又啱啱有唔同嘅車俾我揸; 就係咁, 俾我累積o左十幾廿架唔同車嘅handling, 同埋超過十年路面經驗喇.
直到而家, 成家立室, 呢舖癮始終都係甩唔到...
已經4個多月了, 媽媽嘅唔舒服反應開始減少, 食o野都開始穩定落o黎了...thank god.
下晝再睇醫生, 今次bb好乖, 肯俾人睇o下唔同嘅角度, 最後醫生確定o左係囡囡, 我倆都非常雀躍.
仔/女對我o地o黎講真係完全冇所謂, 不過心裡面一直希望先有個囡囡, 因為如果生仔的話, 同我以前屋企差唔多, 冇咩新鮮感; 而且做爸爸嘅我, 係enjoy俾個囡嗲嘅...再加上自己真係未必可以建立男仔嘅好榜樣, 佢頑皮時我都會癩/玩埋一份, 咁就激死呀媽咯 ; 相反, 如果生女, 媽媽,嫲嫲,婆婆同太婆都應該可以管教得貼貼服服...而我就當然係負責同佢玩啦...事實上, 囡囡如果生得似媽咪, 我都ok開心o架, 當然仲要似我咁醒啦...
做唔到繼後香燈嘅任務, 相信d封建時代思想嘅長輩點都會有d唔開心, 不過有我兩公婆o錫晒, 一定補番數有突...囡, 放十二萬個心!
就係呢部機, 俾我o地了解到bb嘅一舉一動.
準備檢查喇....有d緊張添...仔定女呢?
bb比起一個月前大o左,重o左呵...鼻鼻都好高o下喎...仲見到手仔添!!
驗埋血, 一切都好正常呀, 真係感謝天父...
因為要迎接小生命嘅來臨, 實在有好多事情需要張羅, 生活模式亦開始改變...對於一向比較自我中心, 自由自在嘅我o黎講, 身與心嘅挑戰都非常艱巨.
不過每當再次覆診, 見到bb一日一日長大, 成形嘅時候, 推動力就會隨之而來. 相信我o地一定可以盡力迎接呢個家庭新成員嘅!!! 同志們, 努力加油!!!
